三思而後行

最近多了一個“精神寄託”，就是追看溏心風暴。為了它，近排會逼自己盡快完成工作趕回家收看此劇。可是最近多了不少responsibilities，昨日亦因此趕不及回家睇溏心，所以就叫老豆幫我錄影該劇。

當我放工回家後，老豆一見到我就同我講：「阿女，我同你講對唔住呀 ...... 老豆“論盡”幫唔到你錄呀」哇！我認識了老豆咁多年，佢都未同我講過對唔住。原來當套劇錄到一半的時候，他想幫我cut廣告，點知佢按了STOP鈕後唔識如何按回REC鈕（我估應該係阿媽幫我開始錄，之後佢出咗街就交比老豆follow up）。我跟住話唔駛講對唔住，唔係好大件事啫 ........... 不過我最後又加多句，「其實你知道自己“論盡”可以唔駛理佢，隨佢自己錄到尾呀 」

今天當我將此番對話轉述給同事時，佢哋都話我衰仲講多句。雖然我其實唔係鬧我老豆，只係好平靜地說出口，但是我對同事們的反應都幾有體會同反省。其實我為何不先三思，衡量一下究竟套劇緊要一點，還是老豆的心情要緊一點？他當時可能已經有點心慌，要不然他都不會講對不起，還有他只是好心想幫我cut廣告而已。相反套劇睇唔到也沒什麼，大不了睇TVB周刊追回劇情。

雖然看起來不是很大的一件事，但對我的反省真的頗大，我有很深的體會何謂三思而後行。特別是我這種口直心快的人，可能許多時候會因此而講了不少別人覺得難堪的說話。真的要多提醒自己。還有 ............ 老豆，對唔住。